Heimavistarráð stendur fyrir bíókvöldi fimmtudagskvöldið 31. janúar n.k. kl. 20. Mynd og snakk í boði fyrir alla íbúa.

Þriðjudaginn 22. janúar verða s.k. gangafundir á heimavistinni. Fundirnir eru upplýsingafundir fyrir íbúa þar sem farið er yfir ýmsar reglur og annað sem er gagnlegt fyrir íbúana að vita af. Við fengum inn nýja íbúa á stóra heimilið nú í byrjun árs og einhverjar breytingar hafa átt sér stað á búsetu þeirra íbúa sem komu inn í haust. Fundirnir eru því tækifæri til að sjá hverjir eru nágrannar og eins hverjir búa í næsta nágrenni, en fundunum er skipt niður eftir göngunum/hæðunum á nýju vist og síðan göngunum á gömlu vist. Tímasetningar á fundunum verða hengdar upp á nýju og gömlu vist og við minnum á að það er skyldumæting á fundinn. Hlökkum til að hitta alla nýja og eldri íbúa og eiga góða stund saman :)

Hannesína Schewing hjúkrunarfræðingur verður með viðtalstíma á vorönn á mánudögum frá kl. 16 - 17 og á fimmtudögum frá kl. 16:30 - 17:30. Hjúkrunarfræðingur er með aðstöðu í herbergi á skrifstofugangi.

Hagnýtar upplýsingar fyrir nýja íbúa sem eru að flyta á heimavistina nú á vorönn. Þegar íbúar koma á heimavistina þurfa þeir að hafa með sér: Sæng og kodda. Sængurver, koddaver og lök. Handklæði og rúmteppi ef vill. Körfu eða annað hentugt undir óhreinan þvott. Herðatré. Leirtau, hnífapör og glös/könnur eru ekki til staðar á herbergjum. Hlífðarlök eru til staðar og hægt að fá til skiptanna í anddyri. Íbúar fá tuskur, svampa og þvottaefni til að þrífa herbergi og baðherbergi þar sem það á við. Ryksugur og moppur eru til staðar á hverri hæð fyrir sig. Íbúar geta endurraðað húsgögnum á herbergjum en verða að skilja við þau eins og þau komu að þeim í upphafi. Íbúar geta aðeins hengt upp myndir eða annað á veggi með "kennaratyggjói" til að koma í veg fyrir að málningin skemmist. Íbúar á nýju vist hafa aðgang á herbergjum að örbylgjuofni og litlum ísskáp. Þeir íbúar sem eru á gömlu vist hafa ekki aðgang að ísskáp á herbergjum, en sumir koma með lítin kæliskáp með sér. Íbúar geta fengið að geyma töskur á svokölluðu töskulofti. Þá er aðstaða í kjallara til að geyma skauta, skíði, skíðaklossa o.s.frv.

Heimavistin verður opnuð aftur á nýju ári sunnudaginn 6. janúar kl. 12:00.

Starfsfólk heimavistar óskar útskriftarnemendum Verkmenntaskólans á Akureyri innilega til hamingju með daginn.

Starfsfólk heimavistar óskar íbúum og fjölskyldum þeirra gleðilegra jóla og farsældar á nýja árinu. Heimavistin verður opnuð eftir jólafrí sunnudaginn 6. janúar kl. 12.

Íbúar MA og VMA eru í prófum nú í desember og þá gilda gilda ákveðnar reglur á heimavist frá 7. desember sem við biðjum alla að virða: • Á próftíma á að vera næði allan sólarhringinn. • Ekki er heimilt að hafa hjá sér gesti nema með sérstöku leyfi starfsmanns. • Ekki eru veitt leyfi fyrir næturgestum meðan á próftíma stendur. • Morgunmatur er virka daga frá kl. 7:15 – 9:15 og um helgar kl. 10:00 – 13:00. Drykkur er alla daga kl. 15:00 - 16:30, einnig um helgar. • Tónlist og sjónvarp á herbergjum og á setustofu má alls ekki valda ónæði. • Seta í anddyri og á göngum á að vera takmörkuð. • Bendum íbúum á að hafa samband við starfsmann á vakt í síma 1602 (úr borðsíma) ef þið verðið fyrir ónæði. Gangi ykkur vel i prófunum og sýnum öll tillitssemi!

Kæru íbúar! Áður en þið farið í jólafrí vinsamlegast munið að: Hafa herbergin snyrtileg, þá verður svo gaman að koma aftur. Fara með allt rusl af herbergjum út í gám. Slökkva á rafmagnstækjum og ljósum. Tæma ísskáp og örbylgjuofn. Loka gluggum. Stilla ofna á 3. Skrá brottför á rauða blaðið í afgreiðslunni. Þeir íbúar sem hætta á heimavistinni um áramót verða að hafa samband við starfsmann og fá „gátlista“ vegna þrifa á herbergi. Við brottför þarf að skila gátlista og herbergið er tekið út. Muna að skila lyklum og kortum. Með jólakveðju Starfsfólk Heimavistar MA og VMA

Bílastæðin mokuð í dag kl. 17 Bílastæðin sunnan við heimavistina verða mokuð í dag kl. 17. Íbúar eru beðnir um að færa bílana sína svo hægt verði að moka stæðin. Snemma í fyrramálið verður svo klárað að moka það sem út af stendur.